Kabhi kabhi mere dil mein khayaal aata hai...
Ke zindagi teri zulfoo ki narm cha'aoo mein
Guzarne paati to shaadaab ho bhi sakti thi
Yeh teergi jo meri zaist ka muqaddar hai
Teri nazar ki sho'aoo mein kho bhi sakti thi
Ajab na tha ke mein begana-e-alam ho kar
Tere jamaal ki renaaiyoon mein kho rehta
Tera gudaaz badan teri neem-baar aankhein
Inhee haseen fasaanoon mein m'hev rehta
Pukaarteen mujhe jab talkhiyaan zamaane ki
Tere laboon se halawat ke ghoont pi leta
Hayaat cheekhti phirtee barhana-sar, aur mein
Ghaneri zulfoo ke saaye mein chhup ke ji leta

Magar yeh ho na saka aur ab yeh aalam hai
Kay tu nahin, tera gham, teri justajoo bhi nahin
Guzar rahi hai kuch is tarah zindagi jaise
Isse kisi ke sahaare ki aarzoo bhi nahi

Na koi jaadah, manzil, na roshni ka suraagh
Bhatak rahi hai khalaaoo mein zindagi meri
Inhi khalaaoo mein reh jaoon gaa kabhi kho kar
Mein jaanta hoon meri hum-nafas, magar yoo-hi
Kabhi kabhi mere dil mein khayaal aata hai !

-- Sahir Ludhyanvi